Rhyddid Gwybodaeth
Mynediad i Wybodaeth
Mae'r Ddeddf Rhyddid Gwybodaeth a'r Rheoliadau Gwybodaeth Amgylcheddol yn rhoi'r hawl i chi wneud cais am fynediad at wybodaeth heb ei chyhoeddi sydd gennym ni, oni bai fod eithriad penodol yn berthnasol.
Gallwch edrych ar ein cynllun cyhoeddi i weld os yw'r wybodaeth rydych yn chwilio amdani wedi cael ei chyhoeddi gennym ni eisoes.
Gallwch weld rhestr o geisiadau Rhyddid Gwybodaeth blaenorol yr ydym wedi ymateb iddynt ar ein cofnod datgeliadau.
Data Agored
Mae data agored yn ddata sydd ar gael i bawb i'w defnyddio a'u hailgyhoeddi fel y dymunant, heb gyfyngiadau hawlfraint, breintiau neu unrhyw systemau rheoli eraill.
Rydym yn cyhoeddi swm sylweddol o'n data yn Agored, a gellir eu gweld a'u defnyddio fel y mynnoch.
Ar hyn o bryd, ar gyfer data Agored yn unig y defnyddir y safle, ond yn y dyfodol, caiff ein data cyfyngedig eu cyhoeddi ar Lle.
Gwneud cais am wybodaeth
Gallwch wneud cais am wybodaeth trwy anfon e-bost atom, trwy ein ffacsio neu drwy ysgrifennu atom.
- Ffoniwch: 0300 065 3000 a gofynnwch am gael eich trosglwyddo i Swyddog Mynediad at Wybodaeth
- E-bost: timmynediadatwybodaeth@cyfoethnaturiolcymru.gov.uk
Rhowch cymaint o fanylion ag y bo modd, gan gynnwys y manylion canlynol i ni:
- Eich enw llawn a'ch manylion cyswllt (cyfeiriad a/neu gyfeiriad e-bost)
- Manylion am yr wybodaeth neu'r dogfennau yr hoffech gael mynediad atynt
- Eich dull dewisol wrth ohebu â ni (e.e. llythyr neu e-bost)
Os ydych chi am weld gwybodaeth y gallwn fod yn ei chadw amdanoch chi, ewch i'n tudalen ar sut i wneud cais am wybodaeth rydym yn gadw am danoch chi.
Cyngor ynghylch sut i wneud cais llwyddiannus
Er mwyn ein helpu ni i ymateb yn brydlon i'ch cais, rydyn ni'n eich cynghori i edrych ar y canllawiau ar wefan y Comisiynydd Gwybodaeth a gwefan Gov.uk ynghylch sut i wneud cais rhyddid gwybodaeth llwyddiannus.
Gall hefyd fod yn ddefnyddiol cynnwys rhif ffôn cyswllt rhag ofn y bydd angen eglurhad arnom ynglŷn â'ch anghenion o ran yr wybodaeth, ac ynghylch unrhyw ofynion o ran hygyrchedd.
Beth sy'n digwydd nesaf?
Pan fyddwch wedi cyflwyno cais, rhaid inni ymateb cyn gynted â phosibl ac ymhen 20 diwrnod gwaith.
Mewn rhai achosion cyfyngedig, mae'n bosibl y gallwn estyn y cyfnod hwn ar gyfer achosion cymhleth. Os felly y bydd hi, byddwn yn rhoi gwybod i chi cyn gynted â phosibl, ynghyd â phryd y byddwn yn gallu ymateb.
A fyddaf yn cael yr holl wybodaeth y gofynnaf amdani?
Mae'n bosibl na fydd yr holl wybodaeth yn cael ei rhoi i chi oherwydd ei bod yn dod o dan esemptiad (o dan Ryddid Gwybodaeth) neu eithriad (o dan Reoliadau Gwybodaeth Amgylcheddol) rhag datgelu ‒ er enghraifft, oherwydd y byddai’n datgelu manylion personol rhywun arall yn annheg.
Ffioedd am wybodaeth
Mae ein hatodlen ffioedd yn nodi ein ffioedd ar gyfer darparu gwybodaeth i chi o dan y Ddeddf Rhyddid Gwybodaeth, y Rheoliadau Gwybodaeth Amgylcheddol a Deddf Diogelu Data 1998.