test

Asesiadau strategol o ganlyniadau llifogydd

Dylai awdurdodau cynllunio lleol gynnal asesiad strategol o ganlyniadau llifogydd ar gyfer eu hardal. Mae Llywodraeth Cymru wedi gofyn i bob awdurdod lleol adolygu ei asesiadau strategol o ganlyniadau llifogydd erbyn mis Tachwedd 2022.

Mae awdurdodau cynllunio lleol yn cynhyrchu asesiadau strategol o ganlyniadau llifogydd i wneud y canlynol:

llywio eu Cynlluniau Datblygu Strategol a'u Cynlluniau Datblygu Lleol
cynllunio a chyflawni datblygu cynaliadwy
darparu tystiolaeth perygl llifogydd ar gyfer cymunedau presennol a datblygiadau newydd

Mae asesiadau strategol o ganlyniadau llifogydd yn nodi'r canlynol:

lle mae llifogydd o bob ffynhonnell yn gyfyngiad cynllunio
lle mae erydu arfordirol yn gyfyngiad cynllunio
perygl llifogydd lleol sydd heb ei nodi ar fapiau cenedlaethol
ffyrdd o reoli perygl llifogydd
cyfleoedd i leihau perygl llifogydd ar gyfer cymunedau presennol

Yr hyn i'w gynnwys mewn asesiad strategol o ganlyniadau llifogydd

I gynhyrchu asesiad strategol o ganlyniadau llifogydd, dylech gyfeirio at bennod 7 o fersiwn newydd Nodyn Cyngor Technegol 15 (TAN15), sydd i’w chyhoeddi fis Mehefin 2023. Fel lleiafswm, dylai eich asesiad strategol o ganlyniadau llifogydd ystyried y canlynol:

yr holl ffynonellau llifogydd
risgiau erydu arfordirol
tystiolaeth o amrywiaeth o ffynonellau, gan gynnwys mapiau a modelau, y Map Llifogydd ar gyfer Cynllunio, Cynlluniau Rheoli Perygl Llifogydd a Datganiadau Ardal
amrywiaeth o senarios newid yn yr hinsawdd, gan gynnwys digwyddiad 1,000 o flynyddoedd
polisïau'r Cynllun Rheoli Traethlin ar gyfer yr ardal
cynlluniau rheoli llifogydd a dŵr naturiol, gan gynnwys Systemau Draenio Cynaliadwy
opsiynau fel adlinio arfordirol a reolir ac adfer gorlifdiroedd lle bo’n briodol, er enghraifft mewn ardaloedd lle mae datblygiad presennol yn anghynaliadwy, neu mewn ardaloedd heb lawer o ddatblygiad
cronfeydd dŵr ac ardaloedd llifogydd
cysylltiadau perthnasol â Strategaeth Genedlaethol Rheoli Perygl Llifogydd ac Erydu Arfordirol Llywodraeth Cymru
cysylltiadau perthnasol â deddfwriaeth arall, e.e. Deddf Llesiant Cenedlaethau’r Dyfodol (Cymru) 2015 a Deddf Cynllunio (Cymru) 2015

Ymgynghori

Yn ystod y cam cwmpasu

Yn ystod y cam cwmpasu, dylech ymgynghori â'r canlynol:

Llywodraeth Cymru
Cyfoeth Naturiol Cymru
eich Awdurdod Llifogydd Lleol Arweiniol

am gyngor ar y canlynol:

cwmpas yr asesiad strategol o ganlyniadau llifogydd
pa wybodaeth berthnasol sydd ar gael
a oes angen modelu hydrolig arnoch

Dylech hefyd ymgynghori yn eich awdurdod lleol ac â rhanddeiliaid eraill, er enghraifft:

cynllunwyr at argyfyngau
timau bioamrywiaeth
cwmnïau dŵr a charthffosiaeth
perchnogion neu ymgymerwyr cronfeydd dŵr

Bydd hyn yn helpu i sicrhau bod eich asesiad strategol o ganlyniadau llifogydd yn hysbysu meysydd gwaith eraill ac nad yw'n gwrthdaro â strategaethau lleol eraill.

Rôl CNC

Rydym yn rhoi cyngor ar y peryglon llifogydd o afonydd a’r môr.

Nid ydym yn cynghori ar lifogydd o’r canlynol:

dŵr wyneb neu ddraeniau
cyrsiau dŵr bach
dŵr daear
erydu arfordirol
cynllunio at argyfyngau
risgiau o gronfeydd dŵr

Darllenwch fwy am yr hyn rydyn ni’n cynghori arno yn Adeiladu mewn ardaloedd lle ceir perygl o lifogydd ac Ein gwasanaeth i ddatblygwyr.

Rydym yn rhoi cyngor a data perygl llifogydd i helpu i gynllunio a pharatoi asesiad strategol o ganlyniadau llifogydd:

Map Llifogydd ar gyfer Cynllunio. Gallwch lawrlwytho'r haenau data ar MapDataCymru
Data Modelau Lleol CNC, ar gael trwy'r Map Llifogydd ar gyfer Cynllunio
arweiniad ar fodelu hydrolig
arweiniad ar fodelu ar gyfer asesiadau o ganlyniadau llifogydd

Efallai y bydd gennym fodelau manwl ar gael. Os oes angen i chi greu model newydd, cysylltwch â ni yn gyntaf i gytuno ar y cwmpas a'r amcanion:

Gwasanaeth cynllunio De-orllewin Cymru swplanning@cyfoethnaturiolcymru.gov.uk

Gwasanaeth cynllunio De-ddwyrain Cymru southeastplanning@cyfoethnaturiolcymru.gov.uk

Gwasanaeth cynllunio Gogledd Cymru northplanning@cyfoethnaturiolcymru.gov.uk

Gwasanaeth cynllunio Canolbarth Cymru midplanning@cyfoethnaturiolcymru.gov.uk

Herio ein mapiau llifogydd

Ar ôl cytuno ar y cwmpas

Ar ôl cytuno ar y cwmpas cychwynnol, dylech ymgysylltu a chydweithio’n ehangach â rhanddeiliaid allweddol eraill, gan gynnwys:

y gwasanaethau brys
awdurdodau priffyrdd
pwyllgorau llifogydd ac arfordirol rhanbarthol

Cynhyrchu asesiad strategol o ganlyniadau llifogydd

Mae hyd at dri cham wrth gynhyrchu asesiad strategol o ganlyniadau llifogydd

Cam 1 – mae angen i bob awdurdod cynllunio lleol sy'n ymgymryd ag asesiad strategol o ganlyniadau llifogydd gynhyrchu hwn
Cam 2 – sicrhau bod awdurdodau cynllunio lleol yn deall peryglon llifogydd yn well wrth ddyrannu safleoedd Cynllun Datblygu Lleol
Cam 3 – a oes risgiau llifogydd sylweddol a allai effeithio ar gadernid safleoedd Cynllun Datblygu Lleol

Cam 1 – casglu gwybodaeth am lifogydd

Mae Cam 1 yn asesiad lefel uchel o’r cyfyngiadau llifogydd yn ardal astudiaeth yr asesiad strategol o ganlyniadau llifogydd. Bydd hyn yn helpu i nodi tir addas i'w ddatblygu nawr ac yn y dyfodol.

Dylech wneud y canlynol:

blaenoriaethu datblygiad mewn ardaloedd lle prin iawn yw'r perygl o lifogydd, os o gwbl
ystyried risgiau erydu arfordirol a pholisïau’r cynllun rheoli traethlin

Dylai eich asesiad gynnwys mapiau sy'n dangos y canlynol:

yr holl ffynonellau perygl llifogydd
maint llifogydd o bob ffynhonnell, gan gynnwys lwfans ar gyfer y newid yn yr hinsawdd (hyd at ac yn cynnwys digwyddiad 1,000 o flynyddoedd)
llifogydd hanesyddol a'u ffynonellau
llifoedd llifogydd dros y tir
llifogydd o systemau draenio artiffisial
llifogydd o fethiant seilwaith (gan gynnwys cronfeydd dŵr a charthffosydd)
risgiau erydu arfordirol

Dylech hefyd gynnwys adroddiad ategol gyda gwybodaeth am y canlynol:

ffynonellau perygl llifogydd
seilwaith rheoli perygl llifogydd presennol
nodweddion ffisegol lleol (naturiol neu o waith dyn) a allai dorri neu drosglwyddo llif llifogydd i ardaloedd eraill nad ydynt mewn perygl uniongyrchol o ffynhonnell y llifogydd
tir sydd ei angen ar gyfer nodweddion ac adeileddau rheoli perygl llifogydd
cyfleoedd i leihau achosion ac effeithiau llifogydd
sut mae cynlluniau a pholisïau rheoli traethlin yn awgrymu y gallai perygl llifogydd ac erydu arfordirol newid dros amser
risgiau o gronfeydd dŵr
effaith gronnus datblygiad / newid yn nefnydd tir, a meysydd o ansicrwydd

Dylai eich mapiau a’ch adroddiad fod mewn fformat y gallwch ei ddiweddaru’n hawdd, er mwyn sicrhau bod yr asesiad strategol o ganlyniadau llifogydd yn aros mor gywir â phosibl.

Cam 2 – cynnwys gwybodaeth fanylach

Bydd angen i chi wneud asesiad pellach os ydych yn ystyried dyrannu tir mewn Cynllun Datblygu Lleol yn y lleoedd canlynol:

ardaloedd sydd mewn perygl o lifogydd
lle y credwch y gallai datblygiad gynyddu perygl llifogydd mewn mannau eraill

Dylai Cam 2 o’r asesiad strategol o ganlyniadau llifogydd fod yn ddigon manwl i chi allu gwneud y canlynol:

nodi dyraniadau safle / ardaloedd twf sydd â'r perygl lleiaf o lifogydd
ystyried mesurau lliniaru llifogydd ar gyfer y safleoedd hyn
penderfynu a ellir datblygu'n ddiogel heb gynyddu perygl llifogydd yn rhywle arall

Mae angen i chi gyfeirio datblygiad i ardaloedd a all reoli perygl llifogydd yn dderbyniol. Mae hyn yn golygu dibynnu cyn lleied â phosibl ar amddiffynfeydd rhag llifogydd uwch presennol neu arfaethedig.

Dylai eich asesiad gynnwys mapiau manwl sy'n dangos y canlynol:

ffynonellau perygl llifogydd
tebygolrwydd llifogydd blynyddol
dyfnder llifogydd
cyflymder llifogydd
peryglon
hyd
effeithiau bylchu/rhwystrau
cymunedau, eiddo, adeileddau, a nodweddion eraill y mae llifogydd yn effeithio arnynt
pa mor agored i niwed yw'r defnydd tir arfaethedig
amddiffynfeydd rhag llifogydd a'r ardaloedd sy'n elwa ar yr amddiffynfeydd hyn

Dylech hefyd gynnwys adroddiad ategol gyda gwybodaeth am y canlynol:

amddiffynfeydd rhag llifogydd (e.e. lleoliad, safon gwarchod, perchnogaeth, polisi cynnal a chadw hirdymor)
canlyniadau llifogydd o ganlyniad i fylchu/rhwystr
digwyddiadau gorlwytho/gormodedd i seilwaith (e.e. systemau draenio, mannau storio)
ffynonellau eraill o lifogydd posibl o fewn ardal amddiffynedig (e.e. o ddŵr wyneb, draeniau sydd wedi’u gorlwytho ac ati)
tystiolaeth i lywio dull dilyniannol o ddatblygu, er enghraifft difrifoldeb ac amrywiad y perygl llifogydd ar draws safle
tystiolaeth i ddangos y gall datblygiad fod yn ddiogel dros ei oes, gan gynnwys mynediad/allanfa addas
tystiolaeth i ddangos dim cynnydd mewn llifogydd mewn mannau eraill
cyfleoedd i leihau achosion ac effeithiau llifogydd
cyfleoedd i reoli/lliniaru perygl llifogydd
cyfleoedd i ddarparu buddion cynaliadwyedd/amgylcheddol ehangach

Cam 3 – profi addasrwydd safle

Efallai y bydd angen i chi baratoi asesiad Cam 3 ar rai safleoedd arfaethedig i gadarnhau bod modd rheoli’r perygl llifogydd i lefel dderbyniol a’i fod yn bodloni gofynion TAN15.

Gall rheoli perygl llifogydd gael effaith sylweddol ar ddyluniad, cost a hyfywedd datblygiadau. Dylai asesiad Cam 3 eich bodloni bod rheoli perygl llifogydd ar gyfer dyraniad yn ymarferol.

Dylai eich asesiad Cam 3 wneud y canlynol:

ystyried amrywiaeth o senarios newid yn yr hinsawdd, gan gynnwys amcangyfrifon pen uchaf
dangos na fydd datblygu'r safle yn cynyddu'r perygl o lifogydd mewn mannau eraill
nodi ffyrdd o wella perygl llifogydd ar gyfer cymunedau presennol
nodi anghenion seilwaith yn y dyfodol

Darganfyddwch fwy am brosiectau rheoli perygl llifogydd CNC.